„დიუთი ფრის“ მაღაზიები წარმოადგენენ თავისუფალი ვაჭრობის პუნქტებს. სსკ 194-ე მუხლის მე-6 ნაწილის „ბ“ პუნქტის თანახმად, „6. ჩათვლის უფლებით აქციზისაგან გათავისუფლებულია:...
ბ) საქართველოს საქონლის მიწოდება თავისუფალი ვაჭრობის პუნქტში რეალიზაციისათვის“.
შესაბამისად, თუ აქციზური საქონლის მიმწოდებელი აქციზის გადამხდელია, ის არ დაიბეგრება აქციზით „დიუთი ფრისთვის“ მიწოდებულ საქონელზე ზემოაღნიშნული საგადასახადო შეღავათის ძალით. თუმცა, აქ გასათვალისწინებელია საქართველოს ფინანსთა მინისტრის 31.12.2010 წ. №996 ბრძანებით დამტკიცებული „გადასახადების ადმინისტრირების შესახებ“ ინსტრუქციის 86-ე მუხლის 1-ლი ნაწილი, რომლის თანახმად:
„1. აქციზის გადამხდელის აქციზისაგან გათავისუფლების საფუძველია „საწყობისა და თავისუფალი ვაჭრობის პუნქტის საქმიანობის ნებართვების გაცემის წესების შესახებ ინსტრუქციის დამტკიცების თაობაზე“ საქართველოს მთავრობის დადგენილებით განსაზღვრული „პუნქტის საწყობში საქართველოს საქონლის შეტანის ცნობა“.
აქ აღნიშნული დადგენილება რამდენჯერმე იქნა გამოცემული საქართველოს მთავრობის მიერ. ამჟამად მოქმედი საქართველოს მთავრობის შესაბამისი დადგენილებაა 16.09.2019 წ. №455 „საბაჟო საწყობისა და თავისუფალი ვაჭრობის პუნქტის საქმიანობის ნებართვების გაცემის წესებისა და პირობების შესახებ ინსტრუქციის დამტკიცების თაობაზე“. ამ დადგენილების ამოქმედების შემდეგ ძალადაკარგულად გამოცხადდა „საბაჟო საწყობისა და თავისუფალი ვაჭრობის პუნქტის საქმიანობის ნებართვების გაცემის წესების შესახებ ინსტრუქციის დამტკიცების თაობაზე“ საქართველოს მთავრობის 2015 წლის 14 სექტემბრის №471 დადგენილება. თუმცა, კურიოზული ფაქტია, რომ ამჟამად მოქმედ №455 დადგენილებაში „პუნქტის საწყობში საქართველოს საქონლის შეტანის ცნობა“ საერთოდ არ არის განსაზღვრული... ეს ცნობა განსაზღვრული იყო მისი წინამორბედი 14.09.2015 წ. №471 დადგენილების ანალოგიური წინამორბედი 2011 წლის 5 იანვრის №9 დადგენილების №7 დანართით, რომელიც ამჟამად გაუქმებულია. ის იწერებოდა 2 ეგზემპლარად, რომლიდანაც ერთი რჩებოდა პუნქტში, ხოლო მეორე ეგზავნებოდა საგადასახადო ორგანოს.
უნდა ვივარაუდოთ, რომ ამჟამად მოქმედ №455 დადგენილებაში ასეთი ცნობის შემცვლელის როლს ასრულებს მისი №3 დანართი „თავისუფალი ვაჭრობის პუნქტში მოთავსებული საქონლის აღრიცხვის ფორმა“. რეკომენდაციას ვიძლევით, თქვენმა საწარმომ მისწეროს წერილი „დიუთი ფრის“ და მოსთხოვოს დამადასტურებელი ცნობა იმის შესახებ, რომ თქვენ მიერ მიწოდებული საქონელი მოთავსებული და აღრიცხულია თავისუფალი ვაჭრობის პუნქტში. ეს თავიდან აგარიდებთ შესაძლო მოდავებას საგადასახადო ორგანოს მხრიდან.