მოგახსენებთ, რომ შპს „ა“-ს (რომლის დამფუძნებელია საქართველოს რეზიდენტი ფპ „ბონდო“ 100%-იანი წილით) შვილობილ კომპანია შპს „გ“-ში აქვს 53%-იანი წილი. ამავე დამფუძნებელს, ბონდოს როგორც ფიზიკურ პირს, ამ შპს „გ“-ში ეკუთვნის 8% წილი.
შპს „ა“ არის მეოთხე კატეგორიის საწარმო, ხოლო შპს „გ“ – მესამე ზომითი კატეგორიის საწარმო. შპს „ა“ შპს „გ“-სთან ერთობლიობაში ქმნის მესამე ზომითი კატეგორიის ჯგუფს.
გვაქვს ასეთი მოსაზრება: ბონდომ როგორც ფიზიკურმა პირმა, შპს „ა“-სგან შეიძინოს შპს „გ“-ის 5% წილი, რათა ამ გზით შპს „ა“ ავარიდოთ მე-3 კატეგორიის ჯგუფის კონსოლიდირებული ფინანსური ანგარიშგების წარდგენას. საინტერესოა თქვენი მოსაზრება ამ საკითხზე.
მიმდინარე წლიდან, როგორ იბეგრებიან (რა განაკვეთით) ის მცირე ბიზნესის სტატუსის მქონე ფიზიკური პირები, რომლებიც ეწევიან შენობა-ნაგებობების სარემონტო მომსახურებას, რაც არ არის მშენებლობა?
ჩვენმა კომპანიამ გასულ წლებში რამდენჯერმე სამედიცინო კონგრესზე დასასწრებად გავუშვით აზერბაიჯანელი ექიმები. ასეთ ხარჯებს ვბეგრავთ ხოლმე არარეზიდენტის საშემოსავლო გადასახადით (10%-ით). ეს დაბეგვრა სწორია? ამ აზერბაიჯანელ ექიმებს არაფერი არ აქვთ საერთო საქართველოსთან და მიღებულ ცოდნასაც აზერბაიჯანში იყენებენ. არგუმენტი რა უნდა გვქონდეს, რატომ დავაფინანსეთ აზერბაიჯანელი ექიმი? სხვა არანაირ ხარჯს არ ვეწეოდით და არ ვწევთ აზერბაიჯანისთვის.
ორ დღგ-ის გადამხდელ შპს-ს შორის მიწოდებული საქონლის ღირებულებაზე გადახდილი თანხის ჩეკის არარსებობის შემთხვევაში (გადახდის სალაროს ჩეკი დაიკარგა, ჩეკის გამომწერი შპს გაუქმებულია), რა სანქციებია გათვალისწინებული?
დარეგისტრირდა ახალი შპს, რომლის საქმიანობის სფეროს წარმოადგენს ონლაინ სწავლება აიტი მიმართულებით. რადგან ახლადგახსნილ შპს-ს არ გააჩნია ფინანსები, დამფუძნებელს შემოაქვს საჭირო თანხები (უპროცენტო სესხი) იმ პირობით, რომ როგორც კი გაუჩნდება შპს-ს შემოსავლები, უკან დაიბრუნებს შემოტანილ თანხებს. ეს პროცესი შეიძლება გაიწელოს დროში. გვაინტერესებს, თანხის უკან დაბრუნების დროს, ხომ არ მოუწევს რომელიმე გადასახადით დაბეგვრა? მოქმედებს თუ არა ისევ ის მიდგომა, როდესაც ვარიცხავდით სარგებელს 20%, გამოყენებული ვადის პროპორციულად და იმავდროულად ხარჯშიც ვატარებდით? როგორ აღვრიცხოთ სწორად, რომ საგადასახადო მიზნებიდან გამომდინარე, არ წარმოგვეშვას რაიმე სახის პრობლემა?
ჩვენი კომპანია იძენს საერთაშორისო სარკინიგზო გადაზიდვის მომსახურებას სს „საქართველოს რკინიგზისგან“ შემდგომი რეალიზაციის მიზნით. რკინიგზის მხრიდან ხდება მხოლოდ რემონტზე გადაზიდული ცარიელი ვაგონების გადაზიდვის მომსახურების დაბეგვრა დღგ-ით. მათი არგუმენტია, რომ თუ საბაჟო რეჟიმში არ არის მოქცეული გადაზიდვა, ის ექვემდებარება დაბეგვრას და დაბეგვრისგან თავისუფლდება მხოლოდ საქონლით დატვირთული ვაგონის გადაზიდვა ან გადაზიდვიდან მომავალი ცარიელი ვაგონის გადაზიდვა.
ჩვენ მიერ ჩვენი არარეზიდენტი დამკვეთი კომპანიისათვის გაწეული მომსახურების ფარგლებში, ხდება ცარიელი სარემონტო ვაგონის გადაზიდვა ქვეყნის ფარგლებს გარეთ. იბეგრება თუ არაა ეს ოპერაცია დღგ-ით?
ცნობისათვის, „საქართველოს რკინიგზა“ ჩვენთვის გაწეულ ამ მომსახურებას დღგ-ით ბეგრავს სრულად.
