„ესტონურ მოდელზე“ მყოფი, მე-3 კატეგორიის სამშენებლო კომპანია – რეზიდენტი შპს აღრიცხვას აწარმოებს მსს ფასს-ით. 2020 წელთან მიმართებაში პირველად უნდა გამოვაქვეყნოთ ფინანსური ანგარიშგება reportal.ge-ზე. გვაქვს შემდეგი შემთხვევები:
1) 2019 წელს მიწის მესაკუთრეს გავუცვალეთ მიწა ბარტერის ხელშეკრულებით აღნიშნულ მიწაზე ასაშენებელ ბინებში. ბინებთან მიმართებაში მიწის უკვე ყოფილი მესაკუთრე დავარეგისტრირეთ, როგორც მომავალი მესაკუთრე (წინარე ხელშეკრულებით);
2) 2019-2020 წლებში ბინების მყიდველებთან ვაფორმებდით წინარე ნასყიდობის ხელშეკრულებებს;
3) 2019-2020 წლებში არის რამდენიმე შემთხვევა, როდესაც მშენებარე ბინა, ჯერ კიდევ ე.წ. „ჰაერი“, მყიდველს გადაეცა საკუთრების უფლებით.
გვაინტერესებს, ზემოთ მოყვანილ შემთხვევებში როგორ უნდა დავითვალოთ და რა თანხა უნდა ავსახოთ 2019 და 2020 წლების ამონაგებში და ხარჯებში მსს ფასს-ის შესაბამისად?
ერთჯერადი ვაუჩერის შეძენის შემთხვევაში, რომლის ღირებულებაც არის 100 ლარი, მიმწოდებელმა და ამ ვაუჩერის გამომშვებმა 80 ლარად მიყიდა აგენტს №1-ს, ხოლო მან თავის მხრივ – 100 ლარად საბოლოო მომხმარებელს.
საბოლოო მომხმარებელმა დამატებით გადაიხადა საქონლის მიწოდების ან/და მომსახურების გაწევის სანაცვლოდ 50 ლარი.
დამატებით გადახდილი ღირებულების შემთხვევაში როგორ მოხდება სასაქონლო ზედნადების გამოწერა (საქონლის დასახელება, რაოდენობა, ღირებულება) მიმწოდებლის მიერ, როდესაც მხოლოდ ვაუჩერის სანაცვლოდ მიღებული აქვს 80 ლარი, ხოლო საბოლოოდ ამ ვაუჩერის მომხმარებელმა გადაიხადა სულ 150 ლარი (შეიძინა 1 ცალი ნივთი)?
ერთჯერადი ვაუჩერის გამომშვებმა პირმა, რომელიც არის ამ ვაუჩერთან დაკავშირებული საქონლის/მომსახურების მიმწოდებელი პირი, 100-ლარიანი ვაუჩერი მიაწოდა აგენტ №1-ს 80 ლარად, თავის მხრივ აგენტ №1-მა მიყიდა აგენტ №2-ს 90 ლარად, ხოლო აგენტ №2-მა გაყიდა საბოლოო მომხმარებელზე 100 ლარად (დასაბეგრი პირები (მიმწოდებელი, აგენტი №1, №2) არიან დღგ-ის გადამხდელები).
პირობა: საბოლოო მომხმარებელმა ვერ გამოიყენა ვაუჩერში მითითებული დრო, რომლითაც შეძლებდა განაღდებას/გამოყენებას (პირობითად, ერთჯერად ვაუჩერს აქვს გამოყენების პერიოდი).
ზემოაღნიშნული ნორმის შესაბამისად, აქვთ თუ არა უფლება დასაბეგრ პირებს (მიმწოდებელი-აგენტი №1-აგენტი №2), რადგან ოპერაცია არ შესრულდა და საქონლის მიწოდება ან მომსახურების გაწევა ვეღარ განხორციელდება, დაკორექტირონ შესაბამის პერიოდში დასაბეგრი პირების მიერ (მიმწოდებელი-აგენტი №1-აგენტი №2) გამოწერილი საგადასახადო ანგარიშ-ფაქტურები?
შპს-ს (იბეგრება ახალი მოგების გადასახადის ე.წ. „ესტონური მოდელის“ მიხედვით) 2020 წელს საქონლის მიწოდებიდან მიღებული აქვს შემოსავალი 100 000 ლარი, ხოლო ხარჯი შეადგენს 50 000 ლარს. 2021 წელს ამავე საწარმომ გასცა შემოწირულება 10 000 ლარი საქველმოქმედო ორგანიზაციაზე.
რა ითვლება წინა წლის წმინდა მოგების 10%-ის ბაზისად – 50 000 ლარი, რომელიც არ გამინაწილებია, თუ 50 000 ლარს გამოკლებული მოგების გადასახადი და გამოკლებული დივიდენდი? თუ, მხოლოდ ვაკლებთ მოგების გადასახადს 15%-ს, ხოლო რაც დარჩება, ეგ ჩაითვლება წმინდა მოგებად და მისი 10% შეგვიძლია მომდევნო წელს დაუბეგრავად გავცეთ საქველმოქმედო ორგანიზაციაზე?
შპს ეკონომიკური საქმიანობის ფარგლებში ლიზინგით გასცემს ქონებას (ავტომობილებს), პირობითად ავტომობილი შეძენილია 2019 წელს 20 000 ლარად (საწარმო იყენებს ქონების გადასახადის დათვლისას წრფივ მეთოდს).
ა) საწარმოს 2019 წელს ლიზინგით გაცემული ავტომობილებიდან მიღებული შემოსავლები შეადგენს 70-71%.
ბ) საწარმო 2019 წელს ლიზინგით გაცემული ავტომობილებიდან მიღებული შემოსავლები შეადგენს 65-69%.
გვაინტერესებს: 1) რამდენი იქნება საწარმოს ქონების გადასახადი 2020 წელს, ასევე 2021 წელს?
2) ასევე, რას ნიშნავს 996-ე ბრძანების მუხლი 88, „დ.ა“ პუნქტი (საწარმოსათვის/ორგანიზაციისათვის, გარდა სალიზინგო კომპანიისა, ლიზინგით გაცემული დასაბეგრი ქონების საბალანსო ღირებულება არის ქონების გაცემის მომენტისათვის არსებული ღირებულება, ხოლო ყოველი მომდევნო წლისათვის ქონების ღირებულებად ითვლება აღნიშნული ქონების ნარჩენი საბალანსო ღირებულება, რომელიც ამ ქონებას ექნებოდა ლიზინგით არგაცემის შემთხვევაში)? თუ მაქვს ბალანსზე ასახული 18000 ლარად ავტომობილი, ხოლო გავეცი ლიზინგით (არ ვარ სალიზინგო კომპანია) 20000 ლარად, 20000 ლარია ქონების გაცემის მომენტისათვის არსებული ღირებულება?
2020 წელს გავხსენი შპს და პანდემიის დროს ვეღარ ვამუშავე. არაფერი ბრუნვა არ მაქვს. ყოველწლიური (და ყოველთვიური) ნულოვანი დეკლარაციების ჩაბარება მაინც მჭირდება? მოგების და საშემოსავლოსი?
