კომპანიას ჰქონდა 17 თვიანი ლიცენზია ქვიშა-ღორღის მოპოვებაზე, სულ გეგმურად 15020 მ3.
1. პერიოდი 09.09.2019–08.03.2020-ზე (ფაქტიური მოპოვება იყო 1440 მ3) – დადეკლარირდა გეგმურის მიხედვით – 5301 მ3;
2. პერიოდი 09.03.2020–08.09.2020-ზე (ფაქტიური მოპოვება იყო 4240 მ3) – დადეკლარირდა გეგმურის მიხედვით – 5301 მ3;
3. ბოლო (5 თვე) პერიოდი 09.09.2020–26.01.2021-ზე (ფაქტიური მოპოვება იყო 8980 მ3, აქედან ჩვენ მოვიპოვეთ 4880 მ3, ხოლო 4100-ზე სხვას მივეცით მოპოვების უფლება, თუმცა მოსაკრებელს ჩვენ ვიხდით) – ესეც რადგან ბოლო იყო, დადეკლარირდა გეგმურის მიხედვით 5301 მ3-ზე.
სულ ფაქტიურად მოპოვებულ იქნა 14660 მ3, გეგმური იყო 15020 მ3.
გვაინტერესებს, ბოლო, მე-3 დეკლარაცია რამდენად სწორად იქნა გაგზავნილი, ხომ არ უნდა გამეგზავნა 8980 მ3-ზე? არ შეეხო ახალი რეგულაციები?
ბუნებრივი რესურსების მოსაკრებლების შესახებ ძალაში შესულ ცვლილებასთან და ფინანსთა მინისტრის №20 ბრძანებასთან დაკავშირებით, გვაინტერესებს, წინა რეგულაციისგან განსხვავებით, რას გვთავაზობს აღნიშნული ცვლილება? კერძოდ, ახალი რეგულაციის მიხედვით, თუ ფაქტობრივი მოპოვება აღემატება გეგმურ მოპოვებას, ვადეკლარირებთ ფაქტობრივს, ხოლო თუ ფაქტობრივი მოპოვება ნაკლებია გეგმურ მოპოვებაზე, ვადეკლარირებთ გეგმურს?
იმ შემთხვევაში, თუ ლიცენზიით სარგებლობის საწყის პერიოდებში ფაქტობრივი მოპოვებების ჯამური მოცულობა აღემატება ათვისების გეგმით გათვალისწინებულ ყოველწლიურად ასათვისებელ მოცულობას და ამასთან ფაქტობრივად მოპოვებული მოცულობა არ აღემატება გეგმით გათვალისწინებულ ყოველწლიურად ასათვისებელ მოცულობას, დეკლარაციის მე-5 სვეტში აისახება ის მოცულობა, რომელიც არ ექვემდებარება მოსაკრებლის გადახდას. ანუ ჯამური ფაქტობრივი მოპოვების მოცულობა თუ არ არის გეგმურზე მეტი, შესაბამისად, გეგმურზე მეტი რაოდენობა არ ექვემდებარება მოსაკრებლის გადახდას მთლიანობაში.
გთხოვთ, განგვიმარტოთ, ცვლილებები რა სხვაობებს გულისხმობს, ანუ ბუნებრივი რესურსების მოსაკრებლის გადახდის და დადეკლარირების თვალსაზრისით რა შეიცვალა ამ ბრძანების გამოცემით?
შპს-მ (მე-4 კატეგორიის საწარმოა, დღგ-ის გადამხდელი) Microsoft-ისაგან შეიძინა საოპერაციო სისტემა „Windows 10“ – 1290 ლარად. შპს შემდგომში გაყიდვებში გამოიყენებს ამ საოპერაციო სისტემას: კომპიუტერებისა და ნოუთბუქების პროგრამულ უზრუნველყოფაში. რა ვალდებულებები ეკისრება შპს-ს ბიუჯეტის წინაშე? გთხოვთ, მიგვითითოთ ბუღალტრული გატარება – Windows 10-ის მიღება დარიცხული ვალდებულებებით. „Microsoft“-ის რეზიდენტობის ცნობა არ გვაქვს.
საქართველოს საწარმო, რომელიც დაბეგვრის ესტონურ მოდელზეა, შემდგომი რეალიზაციის მიზნით ახორციელებს საქონლის (სოფლის მეურნეობის პროდუქცია) იმპორტს აზერბაიჯანული კომპანიიდან DAP TBILISI პირობით (ანუ აზერბაიჯანელი გეზამდე მოიტანს თავისი რისკითა და ხარჯებით). საქონელი გადმოდის საქართველოს საკუთრებაში, როცა დასრულდება ტრანსპორტირება თბილისი-გეზში. აზერბაიჯანელ მიმწოდებელთან გაფორმებულია საქონლის შესყიდვის ხელშეკრულება ფასფორმირების შემდეგი პირობით:
– საქონლის იმპორტისას მიმწოდებელი აზერბაიჯანული კომპანია მყიდველ ქართულ საწარმოს წარმოუდგენს ინვოისს, სადაც საქონელი მოცემული იქნება ე.წ. შესყიდვის პირველადი ფასით. მაგალითისთვის – 1 ლარი ერთეულზე. ეს ფასი გამოიყენება ძირითადად საქონლის იმ ნაწილის საკომპენსაციო თანხის განსაზღვრისათვის, რომელიც არ გაიყიდება, არამედ გაუვარგისდება ამა თუ იმ მიზეზით.
– ქართული საწარმო იმპორტირებულ ამ საქონელს გაყიდის საქართველოში იმ პირობით, რომ ერთეულზე უნდა მიიღოს 0.20 ლარიანი მოგება (იგულისხმება მოგება უშუალოდ რეალიზაციის ამ კონკრეტული ოპერაციიდან), ხოლო ამონაგების დანარჩენ ნაწილს, როგორც იმპორტირებული საქონლის საბოლოო ფასს, გადაუხდის აზერბაიჯანულ კომპანიას.
მაგალითისთვის: იმპორტირებული საქონელი, რომლის თავდაპირველი შესყიდვის საინვოისე ფასი 1 ლარია, საქართველოში თუ გაიყიდა 1.50 ლარად, ქართული კომპანია იტოვებს 0.20 ლარს თავისთვის, ხოლო 1.30 ლარს უხდის არარეზიდენტს, როგორც ეს ხელშეკრულებაში წერია (მიუხედავად იმისა, რომ პირველად ინვოისში დაფიქსირებულია ფასი 1 ლარი) და პირიქით, თუკი ასეთი საქონელი გაიყიდება 0.90 ლარად, მაშინ ქართულ საწარმოს კვლავ დარჩება 0.20 ლარი, ხოლო უცხოელი მიმწოდებელი მიიღებს 0.70 ლარს, როგორც საქონლის საბოლოოდ ფორმირებულ ფასს.
– საქონლის იმპორტის შემდეგ ამ საქონელთან დაკავშირებული ყველა რისკი გადმოსულია მყიდველ საწარმოზე (მ.შ. მისი დაზიანების, შრობის, დაკარგვის ან სხვა მიზეზით გაუვარგისების) და იგი არ ექვემდებარება უკან დაბრუნებას;
– მიმწოდებელ აზერბაიჯანულ საწარმოს არ გააჩნია ამ საქონლის მიწოდებასთან ან/და მის შემდგომ რეალიზაციასთან დაკავშირებული რაიმე სახის ვალდებულებები (გარდა მიწოდებისას საქონლის ხარისხთან დაკავშირებით ზოგადი ვალდებულებისა);
– აზერბაიჯანულ საწარმოს მხოლოდ აქვს უფლება მიიღოს ზემოთ აღწერილი სქემით დაფიქსირებული საბოლოო ფასი, და ამ ფასის სისწორეში დასარწმუნებლად შეუძლია გაეცნოს ქართული კომპანიის რეალიზაციის დოკუმენტებს.
ამ პირობებში:
ა) რა ღირებულებით უნდა გაფორმდეს (როგორ უნდა განბაჟდეს) საქონელი და რა თანხიდან უნდა გაანგარიშდეს საბაჟო გადასახდელები? წარმოიქმნება თუ არა საბაჟო დეკლარაციის დაზუსტების აუცილებლობა საბოლოოდ ინვოისისგან განსხვავებული შესყიდვის ფასის ფორმირებისას? და
ბ) რა წესით დაიბეგრება საქართველოში (ან დაიბეგრება თუ არა საერთოდ) პირველადი საინვოისე ფასისგან განსხვავებული თანხა, რომელსაც დამატებით გადავუხდით ან დავაკლებთ აზერბაიჯანელ მიმწოდებელს საბოლოო ანგარიშსწორებისას?
ვფლობთ არამატერიალურ აქტივს, კერძოდ საბუღალტრო პროგრამას „XYZ““ ERP სისტემები. ეს პროგრამა შექმნილია საკუთარი რესურსებით, რაშიც ვგულისხმობთ, რომ გვყავს თანამშრომლები, რომლებიც წარმოების სპეციფიკის და კომპანიის სააღრიცხვო პოლიტიკის გათვალისწინებით ადგენენ შესაბამის დავალებას, რომელსაც ვუგზავნით საქართველოს ფარგლებს გარეთ უცხოელ პროგრამისტებს და ისინი უზრუნველყოფენ პროგრამაში შესაბამისი ფუნქციონალის და მოდულის დამატებას და გამართულ მუშაობას, არსებობის შემთხვევაში – ხარვეზების აღმოფხვრას. ეს პროგრამა ექსპლუატაციაში შევიდა როგორც არამატერიალური აქტივი 2019 წლის სექტემბერში და ბალანსზე აღიარდა მასზე გაწეული დანახარჯებით, ხოლო ექსპლუატაციაში შესვლის შემდგომ ყოველთვიურად მიმდინარეობს ამ აქტივის სრულყოფა/გაუმჯობესება, ახალი ფუნქციონალის და მოდულის დამატება-ინტეგრაცია (შეიძლება აღნიშნული ფუნქცია სტანდარტულად ჰქონდეს არსებულ პროგრამას, მაგრამ ხდება გადაკეთება და კომპანიის პროცესებზე მორგება, ასევე ხორციელდება სრულიად ახალი ფუნქციონალის დამატება და ინტეგრაცია, როგორც რს პორტალთან, ასევე ონლაინ ბანკთან), რაზეც იხარჯება სოლიდური თანხები. ბასს 38-ის მიხედვით, ექსპლუატაციაში შესვლის შემდგომ გაწეული დანახარჯები ექვემდებარება კაპიტალიზებას და უნდა გაიზარდოს არამატერიალური აქტივის საბალანსო ღირებულება? თუ აღიარებული უნდა იქნეს მიმდინარე პერიოდის მოგება-ზარალში?
პანდემიის პირობებში, ქარხნის თანამშრომლებისთვის ვყიდულობთ პირბადეებს და ხელთათმანებს, ასევე ნაყიდი გვაქვს დამცავი ფარები. ეს ყოველთვიურად ჩამოვწერო თუ წლის ბოლოს და ხარჯის რომელ ანგარიშს მივაკუთვნო?
