ღვინის ქარხანაში შევიძინეთ ცისტერნები. ამ ცისტერნების ერთმანეთთან და შემდგომ სამაცივრე დანადგართან დასაკავშირებლად, დაგვჭირდა სხვადასხვა დეტალების შეძენა: მილები, სამკაპები, მუხლები, გადამყვანები, სულ დაახლოებით 50 დასახელების საქონელი.
ეს საქონელი ცალ-ცალკე რომ არ ავიყვანოთ ბალანსზე და ერთ ანგარიშზე დავსვათ ყველა, დავარქვათ „ცისტერნების მუშა მდგომარეობაში მოსაყვანი საქონელი“ და ბოლოს დავამატო ცისტერნების ღირებულებას, შეცდომა ხომ არ იქნება?
საეჭვო დებიტორულ დავალიანებასთან დაკავშირებით გვაინტერესებს. საგადასახადო კოდექსის თანახმად, ყველაფერი ნათელია, თუმცა აღრიცხვის საერთაშორისო სტანდარტების მიხედვით, რის საფუძველზე არის შესაძლებელი საეჭვო ვალების უიმედოდ აღიარება, რომელ დოკუმენტში წერია?
სამშენებლო კომპანია ყიდის ბინებს „თეთრი კარკასის“ მდგომარეობაში და არეგისტრირებს საჯარო რეესტრში მშენებარე სტატუსით, რადგან ბინები ჯერ ექსპლუატაციაში შესული არ არის. თითოეული ბინა აყვანილია 1640 ანგარიშზე და გაყიდვის მომენტში ჩამოიწერება გატარებით:
დ-ტი 7110 კ-ტი 1640. როგორც აღვნიშნეთ, ბინა არის „თეთრი კარკასის“ მდგომარეობაში, მაგრამ შემდგომ გრძელდება კორპუსის არასაცხოვრებელი ფართის მშენებლობა, მაგალითად: ფასადის მოპირკეთება, სადარბაზოს, ეზოს კეთილმოწყობა...
გვაინტერესებს, ეს ხარჯი 1630-დან პირდაპირ ჩამოვწეროთ 7110 ანგარიშზე, თუ ამ დანახარჯით გავზარდოთ თითოეული ბინის თვითღირებულება? მაგრამ უკვე გაყიდული ბინებისთვის ეს ხომ არ წარმოშობს დამატებით დღგ-ის გადახდის ვალდებულებას (მიუხედავად იმისა, რომ ის არ არის მიწოდება), რადგან ეს დამატებითი ხარჯები არ ეკუთვნის შიდა ბინებს?
საწვავისათვის განკუთვნილი „საბითუმო მიღებისა და მიწოდების ყოველდღიური აღრიცხვის ჟურნალი“, რამდენადაც ინფორმაცია გვაქვს, არსებობს ორი სახის. ერთია საბითუმო მიღება-მიწოდებისთვის და მეორე კი – საცალო მიწოდებისთვის. ანუ, ეს ჟურნალები შედგენილი და მორგებულია საბითუმო და საცალო გაყიდვებით დაკავებულ კომპანიებზე (საქართველოს ფინანსთა მინისტრის ბრძანება №87, 2005 წ. 14 თებერვალი, „ნავთობპროდუქტების მიწოდების აღრიცხვისა და დაბეგვრის კონტროლის ღონისძიებათა შესახებ“, მუხლი 27).
შეძენილ საწვავს ჩვენ ძირითადად ვიყენებთ შიდა მოხმარებისთვის, პროექტებზე მომუშავე ტექნიკისა და სატრანსპორტო საშუალებებისათვის, თუმცა, ხდება საწვავის რეალიზაციაც. გთხოვთ მოგვწეროთ:
ამგვარი ჟურნალი უნდა შევიძინოთ და შემდეგ აუცილებელია მისი საგადასახადოში რეგისტრაცია და ამის შემდეგ იქნება ის მკაცრი აღრიცხვის დოკუმენტი?
ჟურნალის გრაფებში რა მონაცემები უნდა შევიტანოთ, როდესაც ვახდენთ საწვავის შიდა მოხმარებისთვის გამოყენებას/რეალიზაციას?
ამგვარი ჟურნალის დაურეგისტრირებლად წარმოების შემთხვევაში რა სანქცია არის განსაზღვრული?
ამგვარი ჟურნალის არწარმოების შემთხვევაში რა სანქცია არის განსაზღვრული?
ახალი კომპანია იხსნება, მხოლოდ დისტრიბუციას გააკეთებს X საწარმოს ნაწარმის. ასეთი საკითხი წამოიჭრა: „X“-ს ამოსაღები აქვს ვალები დებიტორებიდან, რომელთანაც ახალი კომპანია გააგრძელებს საქონლის მიწოდებას. გადაწყდა, სამმხრივი ხელშეკრულებით, ამოსაღები ვალები გადმოვიდეს ჩვენზე (ახალ კომპანიაზე) და აქედან გაგრძელდეს თანამშრომლობა. ეს ბუღალტრულად როგორ ჩაიწერება, დ-ტი 1410 კ-ტი 8190? ახალ კომპანიას საწყისი ნაშთები აქვს 1410-ზე, ისე, რომ ჯერ მიწოდება არ განხორციელებულა. ეს გადასახადებს წარმოქმნის?
ჩვენს შპს-ს (დღგ-ის გადამხდელს) ჩაერიცხა თანხა არარეზიდენტი უცხოური საწარმოდან. ამ თანხით უნდა მოხდეს საქონლის შეძენა და გადაცემა სახელმწიფო უნივერსიტეტზე, რომელიც გათავისუფლებულია დღგ-ისაგან. აღნიშნული თანხიდან საქონლის შეძენის დროს გადახდილი დღგ-ის თანხა შესაძლებელია ჩაითვალოს ჩვენმა საწარმომ? გვაინტერესებს ბუღალტრული გატარებები. ჩვენს შპს-ს რამე გადასახადის გადახდა ევალება ამ შემთხვევაში, გარდა 15% მოგების გადასახადისა?
