იმ კომპანიებისათვის, რომლებიც მოგების გადასახადით იბეგრებიან „ესტონური მოდელის“ მიხედვით, მოქმედებს სსკ 98² მუხლის მე-3 ნაწილის „ვ“ პუნქტი:
„3. მოგების გადასახადით იბეგრება:...
ვ) არარეზიდენტის, აგრეთვე ამ კოდექსის შესაბამისად მოგების გადასახადისაგან გათავისუფლებული პირის კაპიტალში შენატანი ან აქციის/წილის (გარდა უცხო ქვეყნის აღიარებულ საფონდო ბირჟაზე განთავსებული აქციისა/წილისა) შესაძენად განხორციელებული გადახდა“.
აღნიშნული დებულება თქვენს შემთხვევაზე ვერ გავრცელდება შემდეგი მიზეზების გამო:
კომპანიის ფილიალი – არ არის სხვა იურიდიული პირი, ის ამ კომპანიის ნაწილია. ამიტომ შეუძლებელია სათაო ოფისსა და მის ფილიალს შორის არსებობდეს სასესხო ურთიერთობები (აქ არ ვგულისხმობთ შიდა აღრიცხვას მმართველობითი მიზნებისთვის). იმავე მიზეზის გამო, ჩუქებაც შეუძლებელია მათ შორის (ეს იგივეა, საკუთარ თავს მისცეთ საჩუქარი).
ფილიალისთვის გადარიცხული თანხა ვერც მის კაპიტალში შენატანი იქნება იმ მარტივი მიზეზის გამო, რომ ფილიალს კაპიტალი არ აქვს. სათაო კომპანიისგან მიღებული დაფინანსება კაპიტალში შენატანი არ არის, ის შიდა გადარიცხვაა ერთი იურიდიული პირის ორ სტრუქტურულ ერთეულს შორის.
ამ მიზეზების გამო, თქვენ მიერ საქართველოს ფარგლების გარეთ რეგისტრირებული ფილიალისთვის გადარიცხული თანხები მოგების გადასახადით არ დაიბეგრება.
თუმცა, აუცილებლად გასათვალისწინებელია ის ფაქტი, რომ რადგან ეს ფაქტობრივად წარმოადგენს გადარიცხვას ერთი იურიდიული პირის ორ სტრუქტურულ ერთეულს შორის, ფილიალის მიერ ამ თანხების შემდგომმა გახარჯვამ შეიძლება წარმოშვას მოგების გადასახადით დასაბეგრი თანხები. მაგალითად, თუ თქვენ დაბეგვრის „ესტონურ მოდელზე“ არმყოფ ორგანიზაციას გაუწიეთ საქველმოქმედო დახმარება და შესაბამისი თანხა ფილიალიდან გადარიცხეთ, ეს უნდა დაბეგროთ მოგების გადასახადით სსკ 98³ მუხლის დებულებების მიხედვით. შესაბამისად, თქვენ მზად უნდა იყოთ, წარუდგინოთ გერმანიის ფილიალის ხარჯების მიზნობრიობა და დოკუმენტაცია საგადასახადო ორგანოს გადამოწმების მიზნით, მათი მხრიდან მოთხოვნის შემთხვევაში.