აღნიშნული საკითხი რეგულირდება მსს ფასს-ის 34-ე განყოფილებით „სპეციალიზებული საქმიანობა“ და ბასს 41-ით „სოფლის მეურნეობა“.
ვენახი წარმოადგენს ბიოლოგიურ აქტივს, ხოლო ყურძენი, მისი მოკრეფის შემდეგ – ამ ბიოლოგიური აქტივიდან მიღებულ სოფლის მეურნეობის პროდუქციას. თუ თქვენი შპს მსს ფასს-ის მიხედვით აწარმოებს აღრიცხვას, მაშინ ყურძენი უნდა აღირიცხოს 34.5 მუხლის შესაბამისად:
„34.5. საწარმოს ბიოლოგიური აქტივებიდან მიღებული სოფლის მეურნეობის პროდუქცია უნდა შეფასდეს მისი მიღების მომენტისათვის განსაზღვრული რეალური ღირებულებით, გაყიდვისათვის საჭირო დანახარჯების გამოკლებით. ამგვარი შეფასებით მიღებული სიდიდე წარმოადგენს თვითღირებულებას იმ თარიღისთვის, როდესაც საწარმო იწყებს წინამდებარე სტანდარტის მე-13 განყოფილების – „მარაგები“ ან სხვა შესაფერისი განყოფილების გამოყენებას“.
ამგვარად, ყურძენი მისი მოკრეფის შემდეგ აღირიცხება როგორც მარაგი, რა დროსაც მისი საწყისი სააღრიცხვო ღირებულებაა ამ ყურძნის საბაზრო ფასი, შემცირებული მისი გაყიდვისათვის საჭირო დანახარჯების შეფასებული თანხით.
დანახარჯების „გაორმაგებას“ გარკვეული თვალსაზრისით ეს გამოიწვევს, მაგრამ შემოსავალიც „გაორმაგდება“, რადგან სოფლის მეურნეობის პროდუქციის პირველადი მიღებიდან მიღებული შემოსავალი სხვა არის, ხოლო ამ პროდუქციის გაყიდვიდან მიღებული ამონაგები – სხვა შემოსავალია. ამიტომ, მოცემულ შემთხვევაში დანახარჯების გაორმაგებაზე საუბარი არაკორექტულია.
ანალოგიური დებულებაა მოყვანილი ასევე ბასს 41-ის მე-13 მუხლში:
„13. ბიოლოგიური აქტივებიდან მიღებული სოფლის მეურნეობის პროდუქცია უნდა შეფასდეს ნაყოფის მიღების მომენტისათვის არსებული გაყიდვისათვის საჭირო შეფასებული დანახარჯებით შემცირებული სამართლიანი ღირებულებით. ამგვარი შეფასება არის ღირებულება იმ თარიღამდე, რომლის შემდეგაც გამოიყენება ბასს 2 – „მარაგები“, ან სხვა შესაფერისი სტანდარტი“.
აღნიშნულიდან გამომდინარე, ბუღალტრულ გატარებას ექნება სახე:
დ-ტი 1640 (ან 1620) კ-ტი 6190/„სხვა საოპერაციო შემოსავალი სოფლის მეურნეობის პროდუქციის მიღებიდან“ X, სადაც X არის ყურძნის საბაზრო ფასი, შემცირებული მისი გაყიდვისათვის საჭირო დანახარჯების შეფასებული ღირებულებით.
სოფლის მეურნეობის პროდუქციის მოყვანის ხარჯები მიკუთვნებული იქნება 7*** ანგარიშებზე – „სხვა საოპერაციო ხარჯებზე“ და აისახება ფინანსური ანგარიშგების შესაბამის მუხლში.