შპს-ს სურს საქართველოს ტერიტორიაზე შეიძინოს საქონელი (ცოცხალი ძროხა, ცოცხალი ღორი), დაკლას სასაკლაოზე, დააფასოოს ცალკეული სახის სასოფლო-სამეურნეო პროდუქციად და გაყიდოს ყოველგვარი გადამუშავების გარეშე. ჩვენი მოსაზრება ამ საკითხზე ასეთია: სსკ, მუხლი 8. ტერმინთა განმარტება: „6. ბიოლოგიური აქტივი – ცხოველი ან მცენარე. 61. სასოფლო-სამეურნეო საქმიანობა – ბუღალტრული აღრიცხვის საერთაშორისო სტანდარტი 41-ით გათვალისწინებული საქმიანობა“. (ბუღალტრული აღრიცხვის საერთაშორისო სტანდარტი 41 „სოფლის მეურნეობა“: „5. წინამდებარე სტანდარტში გამოყენებულ ტერმინებს აქვთ შემდეგი მნიშვნელობა: სასოფლო-სამეურნეო საქმიანობა არის საწარმოს მიერ ბიოლოგიური აქტივების ტრანსფორმაციისა და ნაყოფის მიღების მართვა გაყიდვის მიზნით, ან სოფლის მეურნეობის პროდუქციად ან დამატებით ბიოლოგიურ აქტივებად გარდაქმნის მიზნით. ბიოლოგიური ტრანსფორმაცია მოიცავს ზრდას, დეგენერაციას, წარმოებას და გამრავლებას, რაც იწვევს ბიოლოგიური აქტივის ხარისხობრივ ან რაოდენობრივ ცვლილებებს)“. „62. სოფლის მეურნეობის პროდუქცია – სასოფლო-სამეურნეო საქმიანობიდან მიღებული პროდუქტი. ამასთანავე, სოფლის მეურნეობის პროდუქციის სამრეწველო გადამუშავებად (სასაქონლო კოდის შეცვლად) არ ითვლება ბიოლოგიური ტრანსფორმაციის შედეგად სასაქონლო კოდის შეცვლა, აგრეთვე ბიოლოგიური აქტივიდან ნაყოფის მიღება (პროდუქციის მოცილება ან ბიოლოგიური აქტივის სიცოცხლის პროცესის შეწყვეტა)“. სსკ, მუხლი 172. დღგ-ისგან ჩათვლის უფლებით გათავისუფლება: „4. დღგ-ისგან ჩათვლის უფლებით, ასევე გათავისუფლებულია: უ) საქართველოში წარმოებული სოფლის მეურნეობის პროდუქციის (გარდა სეს ესნ-ის 0407 11 000 00 და 0407 21 000 00 კოდებით გათვალისწინებული საქონლისა (კვერცხისა) და 0207 11 სუბპოზიციაში მითითებული საქონლისა (შინაური ქათამი აუქნელი, ახალი ან გაცივებული)) მიწოდება მის სამრეწველო გადამუშავებამდე (სასაქონლო კოდის შეცვლამდე)“; „(სასაქონლო კოდის შეცვლად) არ ითვლება ბიოლოგიური ტრანსფორმაციის შედეგად სასაქონლო კოდის შეცვლა, აგრეთვე ბიოლოგიური აქტივიდან ნაყოფის მიღება (პროდუქციის მოცილება ან ბიოლოგიური აქტივის სიცოცხლის პროცესის შეწყვეტა)“. აღნიშნული დებულებებიდან გამომდინარე, ჩვენთვის ცხადია, რომ მოცემული ოპერაცია გათავისუფლებულია დღგ-ისაგან ჩათვლის უფლებით. ამასვე ადასტურებს სიტუაციური სახელმძღვანელო №1198, რომელიც დღეს აღარ გამოიყენება, თუმცა ნათლად გამოხატავს შემოსავლების სამსახურის პოზიციას მსგავს საკითხთან მიმართებაში. ჩვენი თხოვნაა, შეგვიფასოთ, რამდენად სწორია ჩვენი მსჯელობა და შესაბამის შემთხვევაში მოგვცეთ საჭირო მითითებები. ვფიქრობთ, საქონლის შეძენაზე შევადგინოთ ხელშეკრულება და მიღება-ჩაბარების აქტი საქონლის სრული აღწერილობით, სარეგისტრაციო ნომრის მითითებით, ხოლო დაკვლის მომსახურებაზე ასევე ხელშეკრულება და დაკვლის აქტი, ასევე რაც მთავარია შევადგინოთ აქტი, რომელშიც აღნიშნული იქნება მიღებული პროდუქტების დასახელება და რაოდენობა თითოეული დაკვლის პროცესის მიხედვით. თუმცა გვაინტერესებს, პროდუქტების გამოსავლიანობისა და დანაკარგების შესახებ თუ არსებობს რაიმე დოკუმენტი, რომლითაც შევძლებთ ვიხელმძღვანელოთ?
ზოგადად, ვეთანხმებით თქვენს მსჯელობას, რომ შეძენილი ცოცხალი საქონლის დაკვლა და მისგან მიღებული დაუმუშავებელი (დაჭრა-დაფასოებამდე, გაყინვამდე, დამარილებამდე, გახმობამდე, შებოლვამდე) ხორცპროდუქტების (ხორცი, ტყავი) გაყიდვა გათავისუფლებულია დღგ-ით დაბეგვრისაგან თქვენ მიერ აღნიშნული სსკ 172-ე მუხლის მე-4 ნაწილის „უ“ პუნქტის თანახმად, იმ დათქმით, რომ დასაკლავი საქონელი (ძროხა, ღორი) იყო საქართველოში წარმოებული პირუტყვი.
თუმცა, თქვენ გვწერთ, რომ აპირებთ დაჭრათ და დააფასოოთ დაკლული საქონლის ხორცი ცალკეული სახის სასოფლო-სამეურნეო პროდუქციად. ამასთან დაკავშირებით უნდა აღვნიშნოთ, რომ საქართველოს ფინანსთა მინისტრის 26.01.2024 წ. №21 ბრძანებით დამტკიცებული „საგარეო-ეკონომიკური საქმიანობის ეროვნული სასაქონლო ნომენკლატურის“ (სეს ესნ) თანახმად, მსხვილფეხა რქოსანი პირუტყვის/ღორის დაკვლისაგან მიღებულ პროდუქტს ჰქვია „დაუფეშხოებელი ნაკლავი და დაფეშხოებული ნაკლავი“, რომლის სეს ესნ კოდია 0201 10 000 00 (მსხვილფეხა რქოსანი პირუტყვისთვის) და 0203 11 100 00 (შინაური ღორისთვის), ხოლო მათი შემდგომი დაჭრა-დაფასოება, ასევე სუბპროდუქტების გამოცალკევება იწვევს სასაქონლო კოდის ცვლილებას, ანუ მათი გაყიდვა აღარ ჩაითვლება პირველადი სახის (სამრეწველო გადამუშავებამდე) სოფლის მეურნეობის პირველადი პროდუქტის მიწოდებად, რადგან მათზე სსკ 172-ე მუხლის მე-4 ნაწილის „უ“ პუნქტით გათვალისწინებული საგადასახადო შეღავათი ვერ გავრცელდება. თუმცა, მათი დღგ-ით დაბეგვრა მაინც არ მოხდება, რადგან მათზე გავრცელდება სსკ ამავე მუხლის მე-4 ნაწილის „ფ“ პუნქტი:
„4. დღგ-ისგან ჩათვლის უფლებით, ასევე გათავისუფლებულია:...
ფ) საქართველოში მთლიანად წარმოებული საქონლისაგან მიღებული სეს ესნ-ის 0201, 0203 11–0203 19, 0204 10 000 00–0204 23 000 00, 0204 50 110 00–0204 50 390 00 კოდებით გათვალისწინებული საქონლის (მათ შორის, გატარებული/დაკეპილი ფორმით არსებულის (ფარშის)), საქართველოს ბინადარი ცხოველისგან მიღებული პროდუქტის სამრეწველო გადამუშავების შედეგად წარმოებული ყველის, აგრეთვე სეს ესნ-ის 0802 22 000 00 კოდით გათვალისწინებული საქონლის (ნაჭუჭგაცლილი თხილი) მიწოდება“.
როგორც მოყვანილი დებულებიდან ჩანს, ამ შეღავათის გამოსაყენებლად აუცილებელია, რომ ეს ხორცპროდუქტები – სეს ესნ-ის 0201, 0203 11–0203 19, 0204 10 000 00–0204 23 000 00, 0204 50 110 00–0204 50 390 00 კოდებით გათვალისწინებული საქონელი მთლიანად საქართველოში წარმოებული საქონლისაგან იყოს მიღებული.
პირველად საბუთების გაფორმებასთან დაკავშირებით შენიშვნები არ გვაქვს.
რაც შეეხება ბუნებრივ დანაკარგებს, ამჟამად შემოსავლების სამსახურის მიერ დადგენილია ნორმები რიგ დანაკარგებზე, რომლებიც შეგიძლიათ იხილოთ https://rs.ge/OrdersoftheHeadoftheRevenueService?cat=4&tab=1 ელექტრონულ მისამართზე. ხორცპროდუქტების დანაკარგების ნორმები მათ შორის არ არის, რადგან ისინი შემოსავლების სამსახურს ჯერ არ დაუდგენია. შეგიძლიათ ისარგებლოთ სხვადასხვა სამეცნიერო-ტექნოლოგიური წყაროებით, რომლებიც მრავლად არის ხელმისაწვდომი ინტერნეტში (მათ შორის, ჯერ კიდევ საბჭოთა კავშირის დროს მოქმედი ე.წ. „გოსტ“-ები).
