კორპორაციული ღონისძიების გამართვა არ არის საქონლის მიწოდება, არამედ მომსახურების გაწევაა. სსკ 160¹ მუხლი „მომსახურების გაწევა“ კი განსაზღვრავს:
„2. ანაზღაურების სანაცვლოდ, მომსახურების გაწევად ასევე განიხილება:
ა) დასაბეგრი პირის მიერ მომსახურების უსასყიდლოდ გაწევა მისი დაქირავებული პირის პირადი სარგებლობისთვის ან საკუთარი საქმიანობის მიზნისგან განსხვავებული მიზნით“.
აღნიშნულიდან გამომდინარე:
1) მომსახურების გამწევს საგადასახადო ანგარიშ-ფაქტურა რომ არ გამოეწერა საერთოდ, შეიძლებოდა გვეთქვა, რომ მან მომსახურება პირდაპირ გაუწია ამ კომპანიის თანამშრომლებს, ხოლო კომპანია მომსახურების მიმღები კი არა, მხოლოდ თანხის გადამხდელი იყო, თანამშრომლების სახელით. ამ შემთხვევაში, გადახდილი თანხა იბეგრება როგორც ხელფასი და კომპანიის ქმედება სწორი იქნებოდა;
2) მაგრამ, რადგან საგადასახადო ანგარიშ-ფაქტურა გამოწერილია, ესე იგი კომპანიამ შეიძინა ეს მომსახურება და შემდეგ მიაწოდა (ცხადია, სასყიდლის გარეშე) თავის თანამშრომლებს. ამიტომ, ზემოაღნიშნული 160¹ მუხლის მე-2 ნაწილის „ა“ პუნქტის თანახმად, კომპანიამ დღგ-ით უნდა დაბეგროს თანამშრომლებისათვის კორპორაციული საღამოს გამართვის მომსახურება, ხოლო რესტორნიდან წარმოდგენილი ა/ფ-ის მიხედვით დღგ უნდა ჩაითვალოს (აქ შევნიშნავთ, რომ საქმე მომსახურების გაწევასთან კი არა, საქონლის მიწოდებასთან გვქონოდა, მაშინ დღგ­ ით დაბეგვრის წესი სხვაგვარი იქნება: სსკ 160-ე მუხლის „საქონლის მიწოდება“ მე-2 ნაწილის „გ“ ქვეპუნქტის მიხედვით, დაქირავებული თანამშრომლისთვის საქონლის მიწოდებისას დღგ-ით დაბეგვრა ხდება მხოლოდ მაშინ, როცა დამქირავებელს ამ საქონლის შესყიდვის ან წარმოების დროს, დღგ სრულად ან ნაწილობრივ აქვს ჩათვლილი. ამასთან, ამ შემთხვევაში დღგ-ით დაბეგვრა საბაზრო ფასიდან უნდა მოხდეს, სსკ 164-ე მუხლის მე-7 ნაწილის „ა“ პუნქტის გათვალისწინებით).
სსკ 101-ე მუხლის მე-4 ნაწილიდან გამომდინარე („4. ამ მუხლის მე-2 ნაწილით განსაზღვრული თანხა მოიცავს აქციზს, დამატებული ღირებულების გადასახადს და სხვა გადასახადს, რომელიც უნდა გადაიხადოს დაქირავებულმა“), ამ ღონისძიების მთლიანი თანხა დღგ-ის ჩათვლით ჩაითვლება ხელფასთან გათანაბრებულ განაცემად და დაიბეგრება შესაბამისად, როგორც ხელფასი.