ჩვენი შპს G-ს დამფუძნებელია ესტონურ კომპანია E. მას სურს შემდეგი ოპერაციის განხორციელება:
E-ს შვილობილი და შესაბამისად ჩვენთვის ურთიერთდამოკიდებული კომპანია R ფლობს 2 ერთეულ სარკინიგზო ლოკომოტივს (ადგილმდებარეობა – ლატვია), რომელსაც გადმოგვცემს იჯარით, რის შემდეგაც ჩვენ გადავცემთ იჯარით ამ ლოკომოტივებს მონღოლეთის რეზიდენტ დასაბეგრ პირზე (არაურთიერთდამოკიდებული პირი). ლოკომოტივები იმოძრავებენ ლატვია-მონღოლეთის ტერიტორიაზე და არცერთ ეტაპზე არ გაივლიან საქართველოს.
გთხოვთ დაგვეხმაროთ მოსალოდნელი საგადასახადო ვალდებულებების განსაზღვრაში, კერძოდ:
1) R-სა და G-ს შორის ურთიერთობები:
დღგ – აღნიშნული იჯარა სავარაუდოდ ჩაითვლება საქართველოში გაწეულ მომსახურებად (მომსახურების მიმღების რეზიდენტობით, თუ ლოკომოტივების იჯარაზე მომსახურების გაწევის ადგილად სხვა რამ არ არის გათვალისწინებული) და იქნება ჩვენი მხრიდან უკუდასაბეგრი. თქვენი აზრით, ჩათვლაზე რამე შეზღუდვა ხომ არ გვექნება?
მოგების გადასახადი – ჩვენ ვურიცხავთ მომსახურების ღირებულებას ესტონეთის რეზიდენტს (რეზიდენტობის ცნობა გვექნება), გვაინტერესებს, ხომ არ გახდება აღნიშნული განაცემი მოგების გადასახადით დასაბეგრი.
2) G-სა და მონღოლეთის რეზიდენტ დასაბეგრ პირს შორის ურთიერთობები:
დღგ – მომსახურების მიმღების რეზიდენტობით, იჯარა სავარაუდოდ ჩაითვლება მონღოლეთში დასაბეგრად, რასაც ჩვენ დიდი ალბათობით ვერ გავაკონტროლებთ. რამე ვალდებულება ხომ არ გვეკისრება ამასთან დაკავშირებით? ან საერთოდ ხომ არ ჩაითვლება საქართველოში გაწეულ მომსახურებად?
მოგების გადასახადი – აქ ვფიქრობთ მარტივია, უბრალოდ ვაღიარებთ შემოსავლად. მაგრამ მაინც გვაინტერესებს თქვენი მოსაზრება.
დღგ-ის გადამხდელმა შპს-მ საქართველოს სამოციქულო ავტოკეფალური მართლმადიდებელი ეკლესიის X ეპარქიას (ს/ნ ---------) აჩუქა ძირითადი საშუალება, 975 ლარის ღირებულების, ქველმოქმედების მიზნით. სასაქონლო ზედნადები გამოწერილია. ეს დაიბეგრება დღგ-ით და მოგების გადასახადითაც, ხომ?
წარმოვადგენთ დღგ-ის გადამხდელ შპს-ს, ღვინის ლაბორატორიას. საფრანგეთის ფირმას გადავურიცხეთ მომსახურების თანხა. ეს მომსახურება გულისხმობს შემდეგს: საფრანგეთის ფირმა სხვადასხვა ქვეყანაში აგზავნის ერთსა და იმავე ღვინოს, სადაც ლაბორატორიები (მათ შორის ჩვენც) ამოწმებენ ღვინოს და შესაბამის დასკვნას აგზავნიან ამ ფირმაში. ეს ფირმა უკვე ადარებს ერთმანეთს ამ დასკვნებს, რამდენად ემთხვევა შედეგები, ანუ რამდენად სწორად გასცა ამა თუ იმ ლაბორატორიამ დასკვნა. ამას ISO აკრედიტაცია გვავალდებულებს. ეს რამდენად ჩაითვლება საქართველოში გაწეულ მომსახურებად?
ჩვენი კომპანია – საქართველოს რეზიდენტი შპს (დღგ-ის გადამხდელია), მომსახურებას უწევს საქართველოს სასტუმროებს. ამ მომსახურების უზრუნველსაყოფად ჩვენ ვყიდულობთ IT მომსახურებას აშშ-ის რეზიდენტი კომპანიისაგან, გადახდილ საზღაურს ვბეგრავთ არარეზიდენტის საშემოსავლოთი. ჩვენ მიერ გაწეულ მომსახურებას ვბეგრავთ დღგ-ით, ჩასათვლელ დღგ-ის თანხებს ვითვლით სრულად.
უნდა დავბეგროთ თუ არა არარეზიდენტის ზემოაღნიშნული მომსახურება უკუდაბეგვრის დღგ-ით? თუ კი, მაშინ რამდენად აუცილებელია მისი ასახვა ყოველთვიურ დღგ-ის დეკლარაციაში, იმის გათვალისწინებით, რომ ერთი და იგივე თანხა უნდა დავარიცხო და ჩავითვალო კიდევაც?
ჩვენი კომპანია არის დღგ-ის გადამხდელი. როდესაც სასაქონლო ზედნადებებით უსასყიდლოდ ვაძლევთ საქონელს სხვა იურიდიულ პირებს, რომლებიც არიან დაბეგვრის „ესტონურ მოდელზე“, ამას ვბეგრავთ მხოლოდ დღგ-ით, ხოლო როდესაც გამოვლინდება სასაქონლო დანაკლისი, ამას ვბეგრავთ დღგ-ითაც და საშემოსავლო გადასახადითაც, როგორც ხელფასს.
დანაკლისი რა შემთხვევაში შეიძლება ჩაითვალოს უსასყიდლოდ მიწოდებად და დაიბეგროს მოგების გადასახადით (და არა როგორც ხელფასი)? 50-ლარამდე საჩუქრებს არ ვგულისხმობ, მათი გადაცემა ხომ ისედაც იდენტიფიცირებული უნდა იყოს.
ჰოლდინგის (ჯგუფის) სათავო კომპანიამ, რომელიც დაბეგვრის „ესტონურ მოდელზეა“ და რომელიც ფლობს 5 შვილობილ კომპანიას საქართველოში, ასევე წილს რამდენიმე მეკავშირე საწარმოში (ყველა ეს კომპანია ასევე დაბეგვრის „ესტონურ მოდელზეა“) გააჩუქა ერთ-ერთ შვილობილ საწარმოში არსებული თავისი წილი, სხვა ორ შვილობილ საწარმოზე. იმოქმედებს თუ არა ეს ოპერაცია ჰოლდინგის სათავო კომპანიის დღგ-ის ჩათვლებზე? ჰოლდინგის სათავო კომპანია დღგ-ის გადამხდელია, საფინანსო დაწესებულება არ არის და დღგ-ის ჩათვლას იღებს სრული ოდენობით.
