ჩვენი კომპანია არის დღგ-ის გადამხდელი. როდესაც სასაქონლო ზედნადებებით უსასყიდლოდ ვაძლევთ საქონელს სხვა იურიდიულ პირებს, რომლებიც არიან დაბეგვრის „ესტონურ მოდელზე“, ამას ვბეგრავთ მხოლოდ დღგ-ით, ხოლო როდესაც გამოვლინდება სასაქონლო დანაკლისი, ამას ვბეგრავთ დღგ-ითაც და საშემოსავლო გადასახადითაც, როგორც ხელფასს.
დანაკლისი რა შემთხვევაში შეიძლება ჩაითვალოს უსასყიდლოდ მიწოდებად და დაიბეგროს მოგების გადასახადით (და არა როგორც ხელფასი)? 50-ლარამდე საჩუქრებს არ ვგულისხმობ, მათი გადაცემა ხომ ისედაც იდენტიფიცირებული უნდა იყოს.
ჰოლდინგის (ჯგუფის) სათავო კომპანიამ, რომელიც დაბეგვრის „ესტონურ მოდელზეა“ და რომელიც ფლობს 5 შვილობილ კომპანიას საქართველოში, ასევე წილს რამდენიმე მეკავშირე საწარმოში (ყველა ეს კომპანია ასევე დაბეგვრის „ესტონურ მოდელზეა“) გააჩუქა ერთ-ერთ შვილობილ საწარმოში არსებული თავისი წილი, სხვა ორ შვილობილ საწარმოზე. იმოქმედებს თუ არა ეს ოპერაცია ჰოლდინგის სათავო კომპანიის დღგ-ის ჩათვლებზე? ჰოლდინგის სათავო კომპანია დღგ-ის გადამხდელია, საფინანსო დაწესებულება არ არის და დღგ-ის ჩათვლას იღებს სრული ოდენობით.
მიწა ეკუთვნოდა შპს „იქსს“, დღგ-ის გადამხდელ კომპანიას. შპს „იქსმა“ დაუკვეთა ამ მიწაზე კედლის მშენებლობა სამშენებლო კომპანიას შპს „იგრეკს“. შპს „იგრეკმა“ ააშენა კედელი, მაგრამ ეს დოკუმენტურად ვერ გაფორმდა თავის დროზე, რადგან ვერ მოხდა საფასურზე შეთანხმება. შპს „იქსმა“ ეს მიწა, მასზე აშენებული კედლით, გაყიდა 2024 წლის აგვისტოს თვეში და გაყიდვა მთლიანად დაბეგრა დღგ-ით.
უფრო კონკრეტულად, კედლის მშენებლობაზე კონტრაქტი დაიდო 2023 წლის თებერვალში. პირველ ეტაპზე ჩატარდა დაახლოებით 600000 ლარის სამუშაოები, რომელიც დასრულდა 2024 წლის ივნისში, კერძოდ მოხდა ბეტონის საყრდენი კედლის მშენებლობა, მიწის სადრენაჟო სამუშაოები და მიწის მოსწორების სამუშაოები. თუმცა კონტრაქტი არ დასრულებულა და ამის შემდეგ ივნის-აგვისტოს თვეებში (მიწის გაყიდვამდე) კიდევ დაემატა 150000 ლარის სამუშაოები. ამ ყველაფერზე ჯერ კიდევ არ არის შპს „იგრეკის“ მიერ გამოწერილი საგადასახადო ანგარიშ-ფაქტურა და შესაბამისად თანხაც არ არის მისთვის გადახდილი. არც ფორმა 2 არის გამოწერილი და არც შესრულებული მუშაოების მიღება-ჩაბარების აქტი, რადგან ვერ ვთანხმდებოდით გადასახდელი თანხის ოდენობაზე.
საბოლოოდ, ახლა შევთანხმდით საფასურის თანხაზე, და გვინდა, რომ ამ მშენებელმა კომპანიამ გამოგვიწეროს საგადასახადო ანგარიშ-ფაქტურა და ჩვენ გადავიხადოთ თანხა. რა რისკები არსებობს გადასახადების კუთხით და რა სიმძიმისაა ეს რისკები? საგადასახადო ანგარიშ-ფაქტურა რომელი თარიღით გამოწერონ? შესრულებული სამუშაოების ჩაბარების აქტი რომელი თარიღით უნდა გაფორმდეს?
როგორ ხდება დღგ-ის გადამხდელად ახლად რეგისტრირებული პირისთვის დღგ-ის ჩათვლა იმ საქონელზე (საქონლის გაყიდვა დღგ-ით დაბეგვრადია), რომელიც შეძენილია გასულ წლებში შემდგომი გაყიდვის მიზნით და რომელიც ბალანსზე ნაშთად ჰქონდა ამ პირს დღგ-ის გადამხდელად რეგისტრაციის მომენტისთვის, რაც მოხდა წლეულს, იანვარში?
თუ კომპანია ეწევა კანონით განსაზღვრულ სამედიცინო საქმიანობას (სხვა არაფერს), მაგრამ ისე, რომ შესაბამისი ნებართვა არ აქვს, ისარგებლებს თუ არა საგადასახადო შეღავათით დღგ ში?
კომპანია შპს „X5“-ის დამფუძნებლები არიან:
კახა – 65% წილის მფლობელი;
ზაზა – 35% წილის მფლობელი.
შპს „X7“-ის 100%-ით დამფუძნებელია ზაზა. კახას ამ ფირმაში წილი არ აქვს.
1) ეს ფირმები ითვლებიან თუ არა ურთიერთდამოკიდებულ პირებად?
2) „X5“-მა ასესხა „X7“-ს Z თანხა, უპროცენტო სესხის სახით. პროცენტი უნდა დაიბეგროს თუ არა?
3) შპს „X5“ უწევს სატრანსპორტო მომსახურებას შპს „X7“-ს. ორივე კომპანია დღგ-ის გადამხდელია. აუცილებელია, რომ დავაფიქსიროთ ამ მომსახურების გაწევა და საბაზრო ფასით გამოვუწეროთ საგადასახადო ანგარიშ-ფაქტურა, თუ შეიძლება არ მოვითხოვოთ ამ მომსახურების საფასური და ა/ფ საერთოდ არ გამოვწეროთ? არსებობს აზრთა სხვადასხვაობა.
